|
اصالت – اصالتي سئومك
كؤلگه
اوشاقليقدان بري اَن‌‌‌سيز دووارلاري سوواق محله‌ميزين بؤيوك آغ ساققال و ان اؤنملي اولان «مير بابا»ني اونودا بيلميرم. هر گون صبح يوخودان دوروب- دورماز قاپي‌نين آغزيندا اوتوراردي. بيز اوشاق‌لار هاميميز بير باهانا ايله ايسترديك سلام وئريب، اونون شيرين-شيرين اوخشامالاريندان فايدالاناق. هر بيريميزين سؤز- صحبتي اولسايدي اونونلا آرايا قويارديق او دا اؤز اوشاقليق خاطيرهلريندن اؤرنك وورماقلا دئمك اولار بير جور- بير تهر بيزي دوزگون يولا يؤنلنديرردي.
آتا-آنامدان ميربابانين كئچميشين اؤيره‌نيركن، بيلديم بير زامان‌لار اؤزو اوچون بير كس ايميش. نئچه‌لري اونون سؤزو ايله دوروب اوتورارميشلار. هابئله سو ايچنده ده اون‌لا صلاح ائلرميشلر.
گون‌لر، گليب كئچدي. بير گون صاباح تئزدن ايسته‌ديم اوره‌گيمده اولان سؤزلري مير بابا ايله آرايا قويوب اون‌دان ايصالته گؤره سؤز‌لر سوروشام. دئيم نييه بس ايندي كي اينسان‌لار اؤزلريني اؤزل توتاراق يانليش- يانليش ايش‌لر گؤرور‌لر. اوره‌گيمده بونا فيكيرله‌شيرديم: بو سؤزلري دئسم مير بابانين مندن نه قدر خوشو گله‌جك.
ميربابا اوتوران يئره چاتديمدا اونو اورادا گؤرمه‌ديم. قاپي‌لاريني چالديم كيمسه قاپي‌ني آچمادي. اويان- بوياندان سوروشدوم: بس مير بابا هاردا دي؟ كيمسه سؤزون دوزونو دئمه‌دي. اؤزومو، اونون- بونون گؤزونه دورتوب، دوغرو يانيتي تاپديم. ائله بيل ميربابانين اوغلو اونو سالديغي آپارتمانا آپاريب، بوراني ييخيب باشقا آپارتمان سالماق اوچون. اؤز اؤزومله: آخي مير بابانين آرزوسويدو اؤلوسو آتا- باباليق ائويندن چيخسين!
بلكه‌ده گرك آرزولاري دا ائولر كيمي يئنيله‌دك. اونون ساليغين آختارمالييام.
***
اؤنملي: اهميتلي، مهم
اؤرنك : نمونه، مثال
يؤنلنديرردي: هدايت ائدردي
اؤزل: خاص، ويژه
يانليش (يالنيش): اشتباه
يانيت: جواب
ساليق: آدرس
(ائل گونو) تير 1391
|
