|
اصالت – اصالتي سئومك
حامد سهرابي
هامي‌سي آتيليب دره‌ني كئچميشديلر. تكجه من قالميشديم بو تايدا. آت‌لاري سئچنده هامي‌سي منه دؤنوب «سن ده بير اصيل آت سئچ. بو اوزون سفرده، بير قاطير سنه يولداش اولماز!» دئديلر. آمما نئيله‌ييم حئيوانين گؤز‌لري تكجه مني آلميشدي. ايري و مهربان گؤز‌لري ايله، ائله‌بيل منه دئييردي: «مني سئچ، مني آپار، مني بو قارانليق تؤيله‌دن قورتار»
اونلار، هامي‌سي اصيل، جاوان، گوجلو آت‌لاري سئچميشديلر. آمما منيم اينجه اوركلي اولدوغوم گئنه باشيمي بلايا سوخدو. بير قوجا، چاپراز (دورگه)، ايصالت‌سيز آتي سئچميشديم. ايندي، بو درين دره‌نين قاباغيندا ايشتباهيمين تقاسي‌ني وئريرم. بوتون آت‌لار دره‌ني آتيليب، مينن‌لريني سوووشدورموشدو‌لار. آمما من‌له آتيم بو تايدا قالميشديق. اونلار دولانيب دره‌نين اوتاييندان منه گؤز تيكميشديلر. غروروم، كيشيليگيم خطرده ايدي. اؤلسيديم ده بو دره‌نين اوستوندن آتيلماغيم گركلي ايدي. اؤزومه سؤيوش وئرمه‌دن او آنلاماز آدامي سؤيوش آلتينا سالديم. او آنلامازكي بير اصيل آتي بير ايصالت‌سيز آتلا جوتلشديرميشدي. ايندي ده ايشين نتيجه‌سي منيم هئيكليمين آلتيندا، بير دره‌نين اوستوندن آتيلماقدان عاجيزدي.
هئچ آتي قالخديرماميشديم، آمما بيليرديم ايصالت‌سيز، گوج‌سوز اولدوغونا گؤره دره‌دن سوووشا بيلمز. قورخوردوم. قالخيب‌سا مني بيردن- بيره يئر-گؤي آراسيندا بوراخسايدي؛ نه ائيله‌مه‌لي ايديم؟
آمما آغير باخيش‌لارين كسگينليگي مني آتيلماغا مجبور ائديردي. آتيمي سوردوم دالي‌يا. هوولاديم. نه قدر چاپينجا چاپديرديم اونو. لاپ دره‌نين قيراغيندا يئردن قالخدي. گؤز‌لريمي يومدوم، گؤز‌لريمي آچديغيم زامان، اؤزومو دره‌نين اوتاييندا يئرده گؤردوم. اوره‌گيم قاييتدي يئرينه.
يولون آرديندا اؤزومله فيكيرله‌شيرديم، گؤرن من آدامليغيمدا ايصالت‌سيز ايديم يوخسا آتيم آتليغيندا؟
***
سؤيوش: يامان
كسگين: قاطع، بُرّا
ائل گونو - تير 1391
|
