|
ياريش
كؤلگه
قيش‌ين سويوق هاواسي. ائو ايپ- ايستي. آنجاق ائيشيك‌ده گؤز، گؤزو گؤرمور. يئل-
بوراني دير. يئر-گوي قارا بويانيب. آياق يئره قوياندا ديزه تاش، قارا باتير. بله‌دييه
يالنيز آنا خيياوان‌لارين قارين ييغيشديريب. آشاغي محله‌لر قارلا دولودور. او محله‌نين
آدام‌لاري ائو‌لري‌نين اوچماماسين‌دان اؤترو، زورلا دام‌لارين قاري‌ني، ان‌سيز- ان‌سيز
كوچه‌لره آتيرلار. ائولرين بيرين‌ده، حيط‌ده بير اوشاق سارمالاناراق، سئوينجله
آياق‌قابي‌لارين گئيير. آناسي ائوله حيط اورتاسينداكي قاپي‌نين آغزين‌دا دوروب
دئيير:
بالام
بو هاوادا ايتي وورسان ائشيگه چيخماز. سن هارا گئديرسن؟ آتان گلدي نه دئييم؟
اوشاق ايصرارلا: آنا من گرك گئدم يوخسا وقتي گئچر. داي گؤتورمزلر. آخي اورانين سوروملوسو اؤزو دئدي كسين اود گونو گل يوخسا امه‌گين (چاليشماغين) هئچ اولار.
اثرلري بو گون آخشام تهرانا گؤندره‌جكلر. آناسي: ياخشي آتان‌لا اؤزون چيخيشارسان، من بيلميرم. سن كي سؤزه باخميرسان. آناسي‌نين گؤزو اونون آياق‌قابي‌لارينا ساتاشاراق دئدي: آنان اؤلسون آياق‌قابي‌لارين جيريليب، دئميرم آز محله‌ده توپ اوينا. دايان موشامپا وئريم گئيرسن خياوانا تاش سني كيمسه گؤرمز.
اوشاق گله‌جه‌يه فيكيرله‌شيردي. دوداق‌لاري قاچيردي. سونرا اؤزونه گووه‌نه‌رك گولومسه‌نيردي. سونوندا آناسي ايله ويدالاشيب، ائوين قاپي‌سيني اؤرتوب گئتدي. زورلا اؤزونو خياوانا چاتديردي. اورا كيمين آياق‌لارينا يئكه موشامپا گئيميشدي. خياوانا چاتاندا موشامپاني چيخارتدي.
ائشيكده قوش- قوشلوغوينان جوككوللـه‌ميردي. آياق‌لاريني اويناتماقلا اونلاري قيزديرماغا چاليشيردي، آنجاق يئل باساراق‌لا باشماغيندان كئچيب جورابيندا اولان دليك‌لردن آياق‌لارينا چؤكوردو. ال‌لريني هردن قولتوغونون ايستي‌سي ايله دونمادان قوروردو. اوزونده ايكي گؤزدن سوواي هئچ نه گؤرسنميردي. شال، آغيز حنريني ائشيگه گئتمه‌سيندن ساخلاييردي. بالا- بالا سويوق جانينا چؤكوب، اوشاغين يئريمك تووو‌نو آليردي. آنجاق او چانتاسي‌نين ايچينده اولان، دئيرلي شئيه گؤره، هر نئجه اولمالي ايدي اؤزونو اورا چاتديرماسي گره‌كيردي. هردن يئره ييخيليب سونرا دوروب يوللانيردي. يئلدن اؤترو مؤحكم چانتاسي‌ني ياپيشيردي. .مقصده آز قالميشدي. آرتيق قيچي دالي‌سيجا گلميردي. گوجله اؤزونو چكيردي. دوواردان يارديم آليب، بالا- بالا دووار قيراغيندان يئريردي. سونوندا مقصده چاتدي. اوشاغين گؤزو قاراليردي. سئوينجله قاپي‌ني آچماق ايسته‌دي آنجاق قاپي آچيلمادي. گؤز‌لري آخيردي، زورلا اوزه‌رينده‌كي كاغاذي اوخوماق ايسته‌ييردي. او آن سوستالميش آياق‌لاري زويوب اونو يئره ييخماغا مجبور ائتدي. چانتاني قوروماق اوچون يئنه ال‌لريني اونا دولاميش دي. قاپي‌نين اوستونده اولان كاغاذدا يازيلميشدي: بورا دوزه‌ليش(تعمير) آشاماسيندا دير. يئني ساليق، 10-جو خيياواندا اولان آغ بينا.
يئنه گئتمه‌لي ايدي. يئره دؤشنميشدي. گون چيخيردي، اؤز ايستي‌سي ايله قار‌لاري اريديردي. نورچادان ساللانان بوزو اريدركن، بير دامچين سو يئره دؤشه‌نن اوشاغين آندينا دامدي. آيينديردي اونو. آيينيب اؤزونه گلديكده، آندين سيلمك مقصدي ايله، قولونو آندينا چكدي. اومودلا دولو آياغا قالخدي. بيرده كاغاذداكي ساليغي اوخويوب يولا دوشدو. يئنه اوزو گولوردو. دوست‌لاري ايله بيرليكده اوخودوغو شئعري اوخويا- اوخويا گئديردي.
"گون چيخدي، لاله چيخدي
قيزيل پياله چيخدي..."
***
حنر: ايستي، حرارت
توو: سرعت
چانتا: كيف
قوروماق: محافظت كردن
آشاما: مرحله
نورچا: ناودان
ساليق: آدرس
بهمن 1390
|
