زنگين ياز

زنگانين توركجه اؤيكو (حيكايه) اوجاغي

حامام كيسه‌سي

+0 بيَن

بؤلوم : آندا يازي‌ (كيلاسدا يازيلان يازي‌لار)

حامام كيسه‌سي

زنگانلي آرار

قيشين اورتا چاغ‌لاري ايدي. اوزون گئجه‌نين بويو لاپار-لاپار ياغان قار، آغ اؤرتويونو دام-دووارا، كؤي-كوچه‌يه سرميشدي! كوچه‌لره قالانان قارين شاختاسي، قاري ننه‌لري كورسوده، كؤرپه ببه‌لري ايسه بئشيك‌ده دوندوروردو! زينت خالا ناهاري آسيب- آسماميش قيزيلجا نوخوشلوغونا اوغرايان 3ياشيندا قيزيني، 7ياشيندا اوغلونا، هر ايكي‌سيني ايسه آللاها تاپشيرير! حيط قاپي‌سيني باغلامادان بيرداها اوجا سسله تاپشيريغيني تكرار ائدير! اوغلودا، -نيگاران اولما آناجان اؤزوم سولمازدان يَليك اولارام!- دئيه جاواب وئرير! گئجه‌ني صوبحه دك خسته بالاسي‌نين باشيندا كئشيك چكن زينتين اوردلاري باتيب، گؤزلري چوخورا دوشموشدو! آخي اونون دار دونيادا، مؤعتاد اريندن ياديگار قالان ،پيشيم-پيشيم ايله بؤيوتموش بالاجا بالالاريندان باشقا بير كيمسه‌سي يوخ ايدي! نه ايسه تله‌سيك بوزارميش چادراسيني اؤرتوب، ياماقلي تورباسيني گؤتوروب، دليك گاليشي‌نين ايچينه بير تيكه موشامپا سالاراق يولا دوشور! ائولريندن حاماما ياريم ساحاتليق يولو، يورويه‌رك گئتمه‌يه مجبور اولان يورغون قادين، يولون بويو بيرآن صغير بالالاري‌نين فيكريندن چيخا بيلميردي!

مستاجرليك، كيمسه‌سيزليك، اوغورسوزلوق هابئله پول‌سوزلوق فلاكتي، قيزجيغازي‌نين خسته‌ليگي ايله بيرله‌شه‌رك، يازيق زينتين بئينيني ديديب يئييردي! قارا باسميش كيمسه‌لر كيمي، خيال عالمينه جوماراق قورخولو اولاي‌لار ايله قارشيلاشيب شاشيردي! دردلي خيال‌لارين درينليگينه دالان زينت خالا، آرخاسيجا گلن حاممالين يا آللاه! خبراول! خبراول! سس‌لريني ائشيتمه‌دن، قيچي ال چرخينه ايليشيب يارالانير! قان سيزان ياراسي‌نين، سيزماسينا اؤنم وئرمه‌دن يولونو داوام ائدير! حاماما چاتينجا ، حامامچي خانيمي، قاش قاباقلي قيزبس‌دن ياراسي‌ني باغلاسين دئيه بير تيكه بئز ايسته‌يير! قيزبس ايسه چيمخيراراق، زينتين يوبانديغي‌ني باشينا قاخاركن، بوزارميش بير اسكي‌دن كسديگي شيريغي اوستونه آتير! حامام دا كولفت كيمي چاليشان صنم ننه، زينتين يارالي قيچيني گؤرونجه؛ آللاه يامانليق وئرمه‌سين بالام نه اولوب! دئيه سورغو وئرير؟ آغزيني آچان زينتين  سؤزونو آغزيندا قويان قيزبس، صنمين جاوابيني وئرير!!                                                                  

-نه اولاجاق! يئنه ده قاراچي قان گؤروب! دئيه زينتين ساي‌سيز يارالاري‌ني دوزلايير! ديلي آجي قيزبس، زهَرلي آتماجالاري‌ني آتيب، سونراسي دوه نالبنده باخان كيمي زينته باخيب، خان گليني‌نين حامام دا چوخدان يول گؤزله‌ديگيني بيلديرير! زينت ده ديكسينه‌رك، واوئيلا داش باشيما دئيه حاماما گيرير!

خان گليني زينتي گؤرونجه سليطه‌لر ساياغي، آغزين آچيب گؤزلريني يومور! حيرصيني سويوتسون دئيه دويونجا سؤيور! آز سونرا بيرآز اؤزونه گلينجه، -ائوي خارابين قيزي بئله گله‌جك ايدين منه ده دئيَيدين ائو-ائشيگيمي بوشلاييب سنين اللافين اولمايايديم! بير ساعات دير مني بورادا ايش اوستونه قويوب اؤز كئفينه باخيرميشسان دئيه، آل بوياغا بويانميش دوداق‌لاريني بوزور! قورخودان قينينا قيسيلميش زينتين ديلي گلر- گلمز گلين خانيمين گؤيلونو اوخشاماغا چاليشير! -خانيم جان! سيز آللاه باغيشلايين! آدي باتميش قيزيلجا، قيزيمي موم كيمي اريديب سومويه چيخارديب! گئچن گئجه ايت ياتدي من ياتماديم! اونا گؤره سحره ياخين بيلمه‌دن يوخويا داليب يوخودا قالديم! قاش- قاباغي يئر سوپورن گلين، ماجراني آنلاييب بيلينجه، زينتين اوزونه باخمادان، -هادي تئز اول ايشيني باشلا! ايشيم، ائو- ائشيگيم، قالدي! دئيه چؤمبه‌لير! گلين خانيما خيمير- خيمير باخان زينتين گؤزلري ايشيقلانيب، سولغون دوداق‌لارينا گولوش قونور. گؤزلريم اوسته خانيم جان دئييب، حامام كيسه‌سيني چيخاريب ايشي باشلاماق اوچون ال آتير تورباسينا! توربايا اوزانان الي بوشا گئدينجه، زينتين ديل-داماغي قورور! بلالي باشينا داغ سو تؤكولموش، يوخسا ايلان چالميش آداما چؤنور! كيسه‌ني يويوب قوروتماق اوچون بوخاري اوستونه سريب گؤتورمه‌ديگيني خاطيرلايير! قورخونج فيكيرلر، يورغون بئيني‌ني بورويور! -كيسه آليشيب يانارسا باشيما نه داش سالمالييام!؟ نه‌دن گؤزومون اؤنونه سرديگيم كيسه‌ني گؤروب گؤتورمه‌ديم!؟- دئيه درين خيالا دالير! آجي خيال‌لار باتلاغيندا ال-آياق چاليب چابالايان زينتي، گلين خانيمين، -بي! ايتين قيزي مني ساريميشسان- دئييب چيغيرماسي، ديكسينديريب، اؤزونه گتيرير!

1392 باهارين ايلك آيي


یازار : زنگين ياز چهارشنبه 19 تیر 1392 | باخیش لار (0)

سايين اوخوجولار:
بورا حيكايه اوجاغي‌دير.
زنگان‌ين حيكايه يازارلاري اؤز چاليشمالاري‌ني بورادا سيزلره سوناجاقلار.
اؤنري‌لرينيز بيزه اؤنملي‌دير.

آنا یارپاق

آرشیو

ایلگی

آختاریش

بؤلوم لر

آندا يازي‌ (كيلاسدا يازيلان يازي‌لار) (10)

اؤز يازي (4)

قوناق يازي (0)

چئويرمه (0)

طنز (3)

اوشاق يازي‌سي (0)

كيتاب تانيتيمي (0)

الشديرمه (نقد) (0)

ساو (خبر) (0)

 

یولداش لار

سون یازیلار

بزكلي قيز

حامام كيسه‌سي

غربت

درگي

حامام كيسه‌سي

يوخو

قار تؤكـن

اؤلــوم

يوخودان سونرا

بارمــاق

چؤره‌گه چيخما

اصالت

ياريش

قورد

اصالت

آرشيو

مرداد 1392

تير 1392

بهمن 1391

باغلانتی لار

اوچلوك

ايشيق

سایغاج

ایندی بلاق دا :
بو گونون گؤروشو :
دونه نین گؤروشو :
بو آیین گؤروشو :
بوتون گؤروش لر :
یازی لار :
باخیش لار :
یئنیله مه چاغی :

ایمکان لار

RSS 2.0