اونون يئكه كوره‌گي سينميشدي. دئدي: گئت اونا بير سس آت، گلسين. بير- ايكي ايل‌دن سورا قالخيب، چيخديم حيطه. كنديميزين يئيين اسن يئل‌لري، ياغان قار دنه‌لري‌ني سوووروردو دام‌لارين باشينا. كؤهنه دامين، دوواري ديبين‌ده سسيمي اوجالتديم: «عمي جان؛ حاجي بابانين كوره‌گي سيندي. گل گؤر نه دئيير. سني ايستير...» اونو گؤزله‌ديم. بؤركو باشيندا، قارا يون كوت- شالواري اوستونه قونان قار دنه‌لري ايله دامين قيراغين‌دان بويلاندي منه. بوينونا ساريديغي شال‌ين آرخاسين‌دان نه گؤي گؤزلري، نه ده بورما بيغ‌لاري‌ني گؤره بيلديم. «گئت ائوه، گليرم ايندي.» دئييب؛ گؤزدن ايتدي.

گون‎لرين بير گونو، من ايله موللانصرالدين ائوده اوتوروب، شمشين ائله‌ييرديك كي موللانصرالدين بيردن- بيره دئدي: اولان؛ دور گئدك منه بير جوت فوتبال آياققابي‌سي آلاق، فوتبالا زادا گئدنده، او آياققابي‌لار ايله اوينايا بيلمه‌ييرم.

دئديم: موللانصرالدين جان! او اون- اون‌بئش مين تومن يارانه‌نين باشين‌دا اويناما.

دئدي: آغزي-آجيليق سالما. دور ائششه‌گي اوتلا گئدك.

    تئلفونون زينگيلتي‌سي بير قادين‌ين يوخوسونو داغيتدي. او قادين چاشقين يوخودان اويانيب، تئلفونون طرفينه گئدركن سوردو:

گؤره‌سن كيم‌دي زنگ ووران؟ گوشي‌ني گؤتورن‌دن سونرا «الو» دئييب خطّين اوتايين‌داكي سس‌ين ائشيتمه‌سي‌ني گؤزله‌دي. بير قادين‌ين سسي خطّين اوتايين‌دان سلام وئريب، بيرينجي قادين‌ين حالي‌ني سوردو. بيرينجي قادين دئدي: باغيشلايين، من سيزي تانيماديم. ايكينجي قادين دئدي: نئجه تانيمادين، منم!

يازين اوچونجو آيي ايدي. ياز اؤز گؤزلليگي‌ني وار گوجو ايله سريميش ايدي. چيخميش ايديم چؤله گزمه‌گه. گزه-گزه يازين گؤزلليك‌لرين اينجه‌ليرديم، آياق‌لاريم‌دا ايش يوخ ايدي، آنجاق گؤزلريم هر يانا دولانيردي آياق‌لاريمي دا اؤزلريله آپاريرديلار.

باخا-باخا گئديب بير دره‌يه يئتيشديم. گؤردوم او دره‌دن گؤز ياشي كيمين چوخلو بير سو گلير. اؤز- اؤزومه دئديم: گؤرن اولار، بوگون گون‌اورتايا چاتان چاغا بو آخار سويون باش بولاغينا گئديب، گون باتماميش قاييدام؟! دئديم، دوشدوم يولا...

هر كيمسه‌ ايشچي ايشله‌ديب او بيلر، البته آرزيميز بودور هئچ كيمسه‌نين ائوينه بو گونكو حالدا، اصلن هئچ حالدا، بئل-كولونگ گيرمه‌سين. هله گيرمه‌سي يوخسا گيرمه‌مه‌سي ايله ايشيميز يوخ‌دور، كيم دئيير ايشيميز وار؟! ايشيميز يوخ‌دور، سؤزوموز كي وار. سؤزوموز بودور: ايشچي ائوده، باغدا، بئله بير يئرلرده ايشله‌ينده بير چؤره‌گه چيخار. ايندي چؤره‌گه چيخاندا ايش ياتار دا! مثلن بير نفر زنگ وورار ايش يييه‌سين‌دن سوروشار، ايش نه يئرده‌دير؟ ايش يهه‌سي دئير: هئي... پيس دئييل، هله ايشچي‌لر چيخيبديلار چؤره‌گه.

من كي دوغوردان دوغرويا سني بير آدام كيمي گؤردوگومه گؤره هئچ بيلميرم قاه- قاهام اوجالسين يا‌دا قييهام.

- سن كي قاه- قاها ائتمه‌گه هر زامان تله‌سيرسن بونو من يوخ، بير كوچه اهلي‌ده بيلير، دوشونور، گؤرور...

- بسدي، بسدي. داي من سني... يوخ داي من گؤردوك‌لريمدن سؤز آچماياجاغام.

- ياني؟!

  قيش‌ين سويوق هاواسي. ائو ايپ- ايستي. آنجاق ائيشيك‌ده گؤز، گؤزو گؤرمور. يئل- بوراني دير. يئر-گوي قارا بويانيب. آياق يئره قوياندا ديزه تاش، قارا باتير. بله‌دييه يالنيز آنا خيياوان‌لارين قارين ييغيشديريب. آشاغي محله‌لر قارلا دولودور. او محله‌نين آدام‌لاري ائو‌لري‌نين اوچماماسين‌دان اؤترو، زورلا دام‌لارين قاري‌ني، ان‌سيز- ان‌سيز كوچه‌لره آتيرلار. ائولرين بيرين‌ده، حيط‌ده بير اوشاق سارمالاناراق، سئوينجله آياق‌قابي‌لارين گئيير. آناسي ائوله حيط اورتاسينداكي قاپي‌نين آغزين‌دا دوروب دئيير: بالام بو هاوادا ايتي وورسان ائشيگه چيخماز. سن هارا گئديرسن؟ آتان گلدي نه دئييم؟

گوشي‌لرده راحاتجاسينا عكسي ياييلميشدي. اوشاغين بودار- بودار اولماسين گؤردومده توم بئله‌جه باشيما گلن بلا فيلم كيمي گؤزومون اؤنوندن گليب، كئچدي. كيمسه باخجاق اوز-گؤزون قيريشديريب، قوردو ييرتيجي حئيوان آدلانديريردي. من ائله سؤز‌لردن خوشلانميرديم. چونكو قوردون كيمليگي قورد اولماق و آج اولدوقدا هر شئيي بودارلاييب، يئمك دير. جانيميزي قوردلاردان قوروماق بيزيم سوروموموزدور. اونلار اوشاغين عاييله‌سين دانلاماق يئرينه، قوردو متهم ائديرديلر. اوشاقدا قوردلا قارشيلاشما ايمكاني يوخسا ابزاري اولسايدي قورد اونو بودارلامازدي. بلكه ده قوزولاردان بيري اوشاغا قوربان اولاردي.

هامي‌سي آتيليب دره‌ني كئچميشديلر. تكجه من قالميشديم بو تايدا. آت‌لاري سئچنده هامي‌سي منه دؤنوب «سن ‌ده بير اصيل آت سئچ. بو اوزون سفرده، بير قاطير سنه يولداش اولماز!» دئديلر. آمما نئيله‌ييم حئيوانين گؤز‌لري تكجه مني آلميشدي. ايري و مهربان گؤز‌لري ايله، ائله‌بيل منه دئييردي: «مني سئچ، مني آپار، مني بو قارانليق تؤيله‌دن قورتار»

گون آچيلدي. گونش قارانليغي شهرين اوزه‌رينه گون ساچدي، آنجاق هر گون كيمي شهر ايشيقلانمادي. بو شهرين گئجه-گوندوزو فرقلي دئييلدي. گئجه‌لر ده، گوندو‌ز‌لر‌ ده قارانليقدايدي. آنجاق شهرين خالقي‌دا قارانليغا اينانيب، ايشيغا اينانج‎لاري يوخويدو. اصلن ايشيق كؤكدن بو شهرده اونودولموشدو. شهر خالقي بو دوروما عادت ائديب، اؤز ايشيق‌سيز ياشام‌لارينا داوام ائديرديلر. هئچ كيم‌ ده ايشيق‌سيزليغين عيللتيني آختارماغا ماراق يوخويدو. هئچ گونشده ‌ده ماراق يوخويدو! تام گوجويله چاليشيب شهري ايشيقلانديرسين. گون‌لرين بيرينده بير اوزاقدان گلن كؤچري قوشون سؤزو بتر گونشه توخوندو. قوش، گونشي سئوگي‌سيزليگه متهم ائده‌رك شهرين قارانليقدا قالماغيني اوندان بيليردي.