بارمــاق
عبداله فرجي (اينجيك)
يازين اوچونجو آيي ايدي. ياز اؤز گؤزلليگي‌ني وار گوجو ايله سريميش ايدي. چيخميش ايديم چؤله گزمه‌گه. گزه-گزه يازين گؤزلليك‌لرين اينجه‌ليرديم، آياق‌لاريم‌دا ايش يوخ ايدي، آنجاق گؤزلريم هر يانا دولانيردي آياق‌لاريمي دا اؤزلريله آپاريرديلار.
باخا-باخا گئديب بير دره‌يه يئتيشديم. گؤردوم او دره‌دن گؤز ياشي كيمين چوخلو بير سو گلير. اؤز- اؤزومه دئديم: گؤرن اولار، بوگون گون‌اورتايا چاتان چاغا بو آخار سويون باش بولاغينا گئديب، گون باتماميش قاييدام؟! دئديم، دوشدوم يولا...
بو دره‌نين ايچين‌ده، ياز گؤزلليك‌لري‌ني، قوش‌لارين سسي‌ني سويون سسي ايله قاتميش ايدي. چكيجي اورك اوخشايان اؤزل دوروم ياراتميش ايدي. هر يانا باخيرديم گؤزو اوخشايان گؤزل منظره‌لر مني اؤزلرينه ساري چكيب، اويدوروب، ساخلاييرديلار. هردن‌بير اؤزومه گليب دئييرديم: يئري كيشي، يئري! گون باتانا قاييتماليسان. دوشوردوم يولا. گئده-گئده گئديب، چاتديم او چاي‌ين باش قاينار يئرينه.
ديققت ايله باخيب گؤردوم بير بئله سو ايلك باشدا بالاجا-بالاجا بير- بيرلري ايله فرقلي دليك‌لردن سوزولور. بو آندا اوران‌ين هاواسي ايله يورغونلوق، گؤزلريمدن يوخونو ساللاييردي. اؤزومو بير تاختا داشين اوستونه چكيب، باشيمي يئره آتيب، ياتديم. گؤزومو يومار- يومماز بيرآن گؤردوم ائله بيل هئچ گؤزومو او سوزولن دليك‌لردن گؤتورمه‌ميشم. چوخلو ديققت ايله او دليك‌لره باخيرام. او دليك‌لردن بيري‌سي آز، بيري‌سي چوخ، بيري‌سي يالاندان شئه‌له‌نير! بيري‌سين‌دن نئچه دقيقه‌دن بير دامچي دامار- دامماز گؤرسه‌نير!
گؤزومو دولانديريب، گؤردوم من‌دن اويانراقدا بير قوجا كيشي اَيله‌شيب، سانكي اوران‌ين قوروماق سيرلري اونون اوره‌گي ايله ال‌لرينه باقليدير. بورادا تكليك‌دن چيخيب، سئوينه‌رك قوجاني سسله‌ييب، دئديم: عمي جاااااان، عمي جااااان! سن بيليرسن بورا هارادي؟ قوجا گوله- گوله دئدي: هه بيليرم گول اوغلوم، بيليرم. بورا روزو دليك‌لري‌نين اوجاغي دير. بو دليك‌لرين هر بيري بير اينسان‌ين روزوسون گؤسته‌رير.
دئديم: عمي جان سن بيلرسن بو دليك‌لرين هانكي‌سين‌دان منيم روزوم سوزولور؟! هه اوغلوم، هه! او يالاندان شئه‌له‌نن دليك سنينكي‌دير. دئديم: عمي جان اولار من او دليگي آزجانا گئنلدم؟ دئدي: بورايا گلديگينه گؤره سن‌ين حاققين دير، اولور. آنجاق او دليگي گئنلتمه‌گه بئش دقيقه واختين وار، تئز اول، ترپن. منده واختي آز گؤروب تئزليكجه بارماغيمي روزومون دليگينه سوخوب گئنلتمه‌يه چاليشديم. بيردن گؤردوم سو مني بورويور.
دئمه آنام، من ياتاندان سونرا آيران‌ين تولوغون سكي‌ده باشيم‌ين اوستونه قويوب، صؤب دوروب بازارا آپارام. من بارماغيمي سوخوب تولوغو دلميشم....
***
چكيجي: جذاب
اويدوروب: آلداديب، منحرف ائديب
شئه: نم، رطوبت
روزو: روزي
اؤزل: مخصوص
سانكي: انگار كه
سير: سرّ، راز
واخت: واقت
صؤب: صبح
كلمه‌لرله فعل‌لرين هامي‌سي معيار يازيلماييب. هردن زنگان لهجه‌سي ايشله‌نيب.
