مصطفي رزاقي

سرويس‌دن اندي. هميشه كي كيمي برقي پله‌يه ساري يئريدي. ايش‌دن گليردي. برقي پله ده ائله بيل ايشله‌مكدن يورولموشدو. ياواش- ياواش اونو آپاردي اصلي كؤرپونون اوستونه. اوباشدا دا بير برقي پله‌دن انه‌جك ايدي. كؤرپونون آلتيندان گورها گور ماشين كئچيردي. چوخ سايلي گليب گئدن‌لرين آراسيندان بير گوشه‌ده كلوچه ساتاني هميشه گؤرردي. بير دولو كارتون آلتدا، بير كارتون اونون اوستونده، دايانيب كؤرپونون نرده‌سينه، آغزيني آچيب، كلوچه‌لر گؤرونور. سسله‌نير «سه تا هزار» (اوچو مين تومن).

جمعيت آراسيندا ايره‌ليله‌دي. كؤرپونون اورتالاريندا، بير كيشي، دالي‌ني داياميشدي كؤرپونون نرده‌لرينه، ايكي قولونو ايكي يانا آچيب، ديرسك‌لري‌ني نرده‌نين اوستونه قويموشدو. بير الينده بئش- آلتي دنه ايكي دسته‌لي دال سورتن كيسه آسلانميشدي. دال با دال «دو تومن، دو تومن» (ايكي تومن  ايكي تومن) دئييردي. ائله بيل تله‌سيردي. اؤز- اؤزونه فيكيرلشدي «بير آز ياواش- ياواش دئسه نه اولار؟ بيه تئز- تئز دئسه، تئز- تئز آلارلار؟»

***

اصلن بير آي بوندان قاباغا فيكيرلشميردي. يئنه ده هميشه كي كيمي اتوبوسون صندلينده ديزلريني قاباق صندلين دالينا ديره‌ييب «انديشه»يه دك ياتدي. ندنسه هميشه «انديشه»يه يئتيشنده اتوبوس داياناندا او دا اوياناردي.

بو دفه ده يوخولو- يوخولو اندي. برقي پله‌لر اونون يوخاري‌يا داشيديلار. هله ده يوخولو ايدي. او باشداكي برقي پله‌لرين باشينا يئتيشنده يادينا دوشدو «كيسه ساتان يئره اوتورموشدو!» فيكيرلشدي «گوره‌سن نه اولوب».

گؤردو بير كارتونو يئره آچيب، اوستونه آدامس قويوب. يئريييب موشتري‌لر كيمي چؤمبَلدي. «قاباقدان كيسه ساتاردين» زنگان لهجه‌سي ايله سوروشدو «نييه ايندي آدامس ساتيران؟»

كيش باشيني قووزاميردي. آمما اوزونون قيزارماسيندان بيلينيردي بوغوزلانيب. سسي ائشيديلير- ائشيديلمز حالدا بئله دئدي «آرواد اؤلدو. داي آداس گتيريب ساتيرام».

 30/1/1392