|
بزكلي قيز
حميد اسدي
ايستي
بير گونون اورتا چاغي ايدي . شالواري‌نين جيريق‌لاريني دا توز-تورپاق قالانميش،
كؤينه‌گي چيرك‌دن نئچه رنگه دؤنموش قوجا كيشي جوب قيراغين‌دا دوروب، گئچمك ايسته‌ييردي.
چوخ زامان ال- اله سورتن‌دن سونرا، اوردان كئچن قاديني ا...ا...ا... ائتمك ايله
چاغيريب ال‌لري ايله جوبو گؤرسه‌ديب، سونرا محكم ديزلرينه گوبسه‌دي كي ياني كئچه
بيلمه‌مزليگي‌ني بيلينديرسين. سونرا اللريني قادينا ساري اوزاديب كي اون‌دان
يارديم آلسين. قادين چاديري‌ني برك-برك چنه‌سي آلتين‌دا اووجونا سيخيب،
ميرتدانا-ميرتدانا اوزون چئويريب يولا دوشدو . قوجا باشين آشاغي ساليب، جوبون
دوب-دورو سويون‌دا جومموشدو كي بير سس اونو اؤزونه گتيردي.
- حاج
آغا، حاج آغا!
باشين
قووزوياراق يانين‌دا بير گؤيچك بزكلي قيزي سلام وئره‌رك، گؤروب دوروخور.
اوزو
گولوشلو قيز، اليني قوجايا ساري اوزاديب دئدي: حاج آغا الين وئر منه كئچك اووزا
(اويزا، او تايا).
قيزين ساغ الي قوجانين قولتوغون‌دا،
سول الي قوجانين الين‌ده جوبو كئچديلر. قوجا تشككور اوچون نئچه يول اللريني
گؤزلرينه قويوب گتيريب قيزين آياغي آلتا آتيب، اوزو قيزه ساري دالين-دالين يولا
دوشدو. قيز گؤز ياش‌لاري‌ني گيزلتمه‌گه اوزون قوجادان چئويريب باشقا يانا(سمته)
يولا دوشدو.
|
