«ملانصرالدّين»ين بوگونكو حيكايه‌لرين‌دن
اؤلــوم
امضا: موللانصرالدين‌ين يولداشي
گونلرين بير گونو، من ايله موللانصرالدين ائوده اوتوروب، شمشين ائله‌ييرديك كي موللانصرالدين بيردن- بيره دئدي: اولان؛ دور گئدك منه بير جوت فوتبال آياققابي‌سي آلاق، فوتبالا زادا گئدنده، او آياققابي‌لار ايله اوينايا بيلمه‌ييرم.
دئديم: موللانصرالدين جان! او اون- اون‌بئش مين تومن يارانه‌نين باشين‌دا اويناما.
دئدي: آغزي-آجيليق سالما. دور ائششه‌گي اوتلا گئدك.
بونو دا بيلين كي موللانصرالدين بعضن ماشين‌لارا ائششك دئير. بيزيمكي بورادا پرايد دير.
موللانصرالدين‌ين سؤزوندن چيخا بيلمه‌ديم. بيرليك ده دوروب، ائششَگي اوتلاييب، پول آلماق اوچون بانكا گئتديك. ائششَگي بانكين هنده‌ورين‌ده بوراخيب، ايچه‌ري‌يه گيرديك.
موللانصرالدين ميللي كارتي ايله بانك حساب دفتري‌ني، اورانين ايشچي‌سينه وئريب، دئدي: اللي- آلتميش مين پول مرحمت ائله‌يين.
بانك ايشچي‌سي دئدي: بئله دئييل كي، اورادان بير پته آل، سونرا اوتور، سونرا اونلرلر بيلَن. موللانصرالدين دئدي: پته آلميشام، نومره‌سين ازبرله‌ييب، آتديم زيبيل‌قابينا. ايندي ده اونله‌ييبلر. تئز اول، ايشيميز وار.
كيشي بيتيب، موللانصرالدين‌ين مدرك‌لريني آليب، بئش دقيقه‌دن سونرا، دئدي: آقا، سيز اؤلوبسوز. موللانصرالدين دئدي: ياني نئجه؟ دئدي: بو دا فوتنامه‌زين پيرينتي. موللانصرالدين فوتنامه‌ني آليب؛ دئدي: اوغلان بورا باخ! من اؤلموشم؟ گوله- گوله دئديم: اولار بيَه، ديري آدام اؤله؟! دئدي: ايندي كي اؤلوب.
سونرا منيم اليم‌دن ياپيشيب، بانكين ايچه‌ري‌گيرن قاپي‌سيناتك گئتديك. سونرا موللانصرالدين قاپي‌يا گيرن يئرده اوزاندي يئره. منه دئدي: اوغلان قرآن اوخو! دئديم: موللانصرالدين جان! ال‌دن سال. دئدي: آغزي-آجيليق سالما؛ قرآن اوخو. من ده باشلاديم، «...ولاالضّّالين»ـه چاتماميشديم كي خالق بيزي دؤره‌له‌ديلر.
هره‌سي بير زاد دئييردي. موللانصرالدين دوروب، دئدي: آقالار! من اؤلموشم؟ هامي سس‌بير اولوب، دئديلر: يوخ. موللانصرالدين دئدي: آمما بو كاغاذ دئيير كي من اؤلموشم! خالق دا دئدي: كاغاذ كي يالان دانيشماز. دئسه، يوزه- دوخسان اؤلوبسن. اوياندان حراست گليب، بيزي ائشيگه آپاردي.
ائشيگه چيخاندان سونرا موللانصرالدين خيياوان اورتاسين‌دا اوزاندي. گينه خالق ييغيشديلار باشيميزا، دئديلر: نه اولوب؟ موللانصرالدين دئدي: آقالار! من اؤلموشم؟ بير سس ايله دئديلر: يوخ. دئدي: آمما منيم يارانه‌مي وئرمه‌مك اوچون، بو كاغاذ دئيير سن اؤلوبسن. ايكي- اوچو دئدي: واه-واه! قيرخ بئش مينه آدام دا اؤلدورورلر. ايَر بئله پول ايله، كي بيليندي اونلار دلي ايميشلر و... . قالان دا‌دئدي: قوجا كيشي! اوتان، حيا ائله، كاغاذ دا بيَه يالان دانيشار؟ سونرا داغيلديلار.
ائششگيميزين استارتي قولاي اولدوغونا گؤره بيردنه ماشين بيرباش توتدوق سيجيل- احوالا. اورادا دا بئله ايشلري گؤرن‌دن سونرا دئديلر: اؤلن آدام ديريلمز. بيري دئدي: سن منيم آقامي ديريلت، من ده سني ديريلديم.
اويان– بويان... ، ايندي: موللانصرالدين‌ين ايشي اولوب اداره‌لر قاباغين‌دا اوزانماق، منيم ايشيم ده قرآن اوخوماق كي هردن بير پول دا وئريرلر.
خالقين دا ايشي، يا حق دانيشماق يا دا دليليك. هردن ده موللانصرالدين‌ين قولاغينا دئيه‌رم موللانصرالدين سن ده چوخ غليظ‌سن هاا. او دا دئير: خواهش ائله‌ييرم، غليظ‌ليك اؤزوزدن‌دير. هه بس نمه!
***
شمشين: دانيشماق، صحبتلشمك
هنده‌ور: يان دؤوره، اطراف
پته: كوپون، بانك‌دا نؤوبت آلماق اوچون كاغاذ
اونله‌مك: سسله‌مك
بيلَن: سني
بيَه: مگر
بو يازي «بايرام» آيليغين‌دا ياييليب. (41.جي ساي، 17.جي يارپاق – 1391 شهريور آيي)
