ايستي بير گونون اورتا چاغي ايدي . شالواري‌نين جيريق‌لاريني دا توز-تورپاق قالانميش، كؤينه‌گي چيرك‌دن نئچه رنگه دؤنموش قوجا كيشي جوب قيراغين‌دا دوروب، گئچمك ايسته‌ييردي. چوخ زامان ال- اله سورتن‌دن سونرا، اوردان كئچن قاديني ا...ا...ا... ائتمك ايله چاغيريب ال‌لري ايله جوبو گؤرسه‌ديب، سونرا محكم ديزلرينه گوبسه‌دي كي ياني كئچه بيلمه‌مزليگي‌ني بيلينديرسين. سونرا ال‌لري‌ني قادينا ساري اوزاديب كي اون‌دان يارديم آلسين.

    تئلفونون زينگيلتي‌سي بير قادين‌ين يوخوسونو داغيتدي. او قادين چاشقين يوخودان اويانيب، تئلفونون طرفينه گئدركن سوردو:

گؤره‌سن كيم‌دي زنگ ووران؟ گوشي‌ني گؤتورن‌دن سونرا «الو» دئييب خطّين اوتايين‌داكي سس‌ين ائشيتمه‌سي‌ني گؤزله‌دي. بير قادين‌ين سسي خطّين اوتايين‌دان سلام وئريب، بيرينجي قادين‌ين حالي‌ني سوردو. بيرينجي قادين دئدي: باغيشلايين، من سيزي تانيماديم. ايكينجي قادين دئدي: نئجه تانيمادين، منم!

يازين اوچونجو آيي ايدي. ياز اؤز گؤزلليگي‌ني وار گوجو ايله سريميش ايدي. چيخميش ايديم چؤله گزمه‌گه. گزه-گزه يازين گؤزلليك‌لرين اينجه‌ليرديم، آياق‌لاريم‌دا ايش يوخ ايدي، آنجاق گؤزلريم هر يانا دولانيردي آياق‌لاريمي دا اؤزلريله آپاريرديلار.

باخا-باخا گئديب بير دره‌يه يئتيشديم. گؤردوم او دره‌دن گؤز ياشي كيمين چوخلو بير سو گلير. اؤز- اؤزومه دئديم: گؤرن اولار، بوگون گون‌اورتايا چاتان چاغا بو آخار سويون باش بولاغينا گئديب، گون باتماميش قاييدام؟! دئديم، دوشدوم يولا...

  قيش‌ين سويوق هاواسي. ائو ايپ- ايستي. آنجاق ائيشيك‌ده گؤز، گؤزو گؤرمور. يئل- بوراني دير. يئر-گوي قارا بويانيب. آياق يئره قوياندا ديزه تاش، قارا باتير. بله‌دييه يالنيز آنا خيياوان‌لارين قارين ييغيشديريب. آشاغي محله‌لر قارلا دولودور. او محله‌نين آدام‌لاري ائو‌لري‌نين اوچماماسين‌دان اؤترو، زورلا دام‌لارين قاري‌ني، ان‌سيز- ان‌سيز كوچه‌لره آتيرلار. ائولرين بيرين‌ده، حيط‌ده بير اوشاق سارمالاناراق، سئوينجله آياق‌قابي‌لارين گئيير. آناسي ائوله حيط اورتاسينداكي قاپي‌نين آغزين‌دا دوروب دئيير: بالام بو هاوادا ايتي وورسان ائشيگه چيخماز. سن هارا گئديرسن؟ آتان گلدي نه دئييم؟