يوخودان سونرا
زهرا علي‌اكبري
تئلفونون زينگيلتي‌سي بير قادين‌ين يوخوسونو داغيتدي. او قادين چاشقين يوخودان اويانيب، تئلفونون طرفينه گئدركن سوردو:
گؤره‌سن كيم‌دي زنگ ووران؟ گوشي‌ني گؤتورن‌دن سونرا «الو» دئييب خطّين اوتايين‌داكي سس‌ين ائشيتمه‌سي‌ني گؤزله‌دي. بير قادين‌ين سسي خطّين اوتايين‌دان سلام وئريب، بيرينجي قادين‌ين حالي‌ني سوردو. بيرينجي قادين دئدي: باغيشلايين، من سيزي تانيماديم. ايكينجي قادين دئدي: نئجه تانيمادين، منم!
بيرينجي قادين: من هاردان بيليم سن كيم‌سن؟ آدين دئگيلن گؤروم كيم‌سن؟!
ايكينجي قادين: آديم فاطما دير.
بيرينجي قادين: باغيشلا فاطما جان! حالين نئجه‌دير؟ عائله نئجه‌دي؟
فاطما: ساغ اولاسان ياخشي‌يام، سلام‌لاري وار، سيز نئجه‌سيز؟ سيزين عائله؟
بيرينجي قادين: سن ده ساغ اولاسان، عائله ده پيس دئييل.
فاطما: ائشيديبسن نه اولوب؟ گولناز ارين‌دن بوشانيب. ائشيتميشم اري چوخ پيس آدام ايميش، گولناز دا دؤزه بيلمه‌دي. ياخشي اوشاغي يوخودو.
بيرينجي قادين: هانسي گولنازي دئييرسن؟ هه... ياديما گلدي، او گولنازي دئيرسن! او كي اوشاغي وار ايدي! نئجه اوشاق اولا-اولا ارين‌دن بوشاندي؟
فاطما: يوخ بابا، اوشاغي يوخودو... اونو بوشلا، واي بو گون‌لرده گؤروبسن نه قدر قيزيل باهالانيب؟ ايندي نه اولاجاق؟
بيرينجي قادين: بيزيم حاليميزا نه فرقي؟ گنج‌لره اوره‌ييم يانير، بو باهاليق‌دا نئجه ائوله‌نه‌جكلر؟ آمما بونودا دئييم، قيزيل اولماسا، نه اولار!
فاطما: نئجه نه اولار؟! بس ارلريميز قادين گونون‌ده بيزه نه وئريسنلر؟ جاوان‌لار دا پول‌سوز ياشاماغي باشلايا بيلمزلر!
بيرينجي: آللاهين ايش‌لرين‌دن باش چيخارتماق اولماز، بلكه ده بو باهاليق‌لا بيزلري امتحان ائدير. سن نئجه قادين‌سان كي اريني پول اوچون ايسته‌ييرسن؟ ارين پولو اولماسا گولناز كيمي بوشاناجاق‌سان؟
فاطما: يوخ، بئله دئييل، آنجاق بير زاددان باش چيخارتميرام...
بيرينجي قادين: نه‌دن؟
فاطما: سن دئيه‌سن او «جئيران» دئييلسن. هامي سني قيزيل‌لارين‌دان تانييردي، كئچن هفته‌ده تئلفون‌دا قيزيلين باهالاشماغينا گؤره ناله ائديردين. سنه نه اولوب؟
بيرينجي قادين: آمما من «جئيران» دئييلم.
فاطما: بس سن كيم‌سن؟
بيرينجي قادين: من چيچَگم!
فاطما: باغيشلا، ائله‌بيل زنگ وورمادا فَنيكميشم.
چيچك: عيبي يوخ، منيم يوخومو قاچيرتدين! باغيشلامانين دا فايداسي يوخ. آللاه آمانين‌دا.
فاطما: آللاه آمانين‌دا.
***
چاشقين: متعجب
فَنيكميشم: اشتباه ائله‌ميشم
بو اؤيكو، «بايرام» آيليغين‌دا ياييليب. (39.جو ساي، 21.جي يارپاق– 1390 اسفند آيي)
