مصطفي رزاقي

سرويس‌دن اندي. هميشه كي كيمي برقي پله‌يه ساري يئريدي. ايش‌دن گليردي. برقي پله ده ائله بيل ايشله‌مكدن يورولموشدو. ياواش- ياواش اونو آپاردي اصلي كؤرپونون اوستونه. اوباشدا دا بير برقي پله‌دن انه‌جك ايدي. كؤرپونون آلتيندان گورها گور ماشين كئچيردي. چوخ سايلي گليب گئدن‌لرين آراسيندان بير گوشه‌ده كلوچه ساتاني هميشه گؤرردي. بير دولو كارتون آلتدا، بير كارتون اونون اوستونده، دايانيب كؤرپونون نرده‌سينه، آغزيني آچيب، كلوچه‌لر گؤرونور. سسله‌نير «سه تا هزار» (اوچو مين تومن).

بيز اوچ كيشي‌ايديك. كسمه يولوموزو آغاجليقدان سالديق. يولدا بير يولچويا توش گلديك. چيخاريب جيبيندن بير پارا كاغيذ وئردي بيريميزه. « بوردان اوزاقلاشاندان سونرا اوخويون. اوخوياندان سونرا ييرتين، تؤكون قارا آغاجين ديبينه.» دئيه؛ آغ ساققالينا هؤروب بيزه گولومسركن سؤز وئريب، سس- سميرسيز اندي چايلاغا طرف.

گيرديم سلماني‌يه. بير كس نوبه‌ده يوخويدو. اوتوران كيشي‌نين ايشي قوتارينجا، ال اوزاديب ماسا اوستونده‌كي درگي‌لرين بيريني گؤتوردوم. اؤز عكسيم اوستونده ايدي. تازا ورقله‌مه‌يه باشلاميشديم كي چاغيرديلار: «نوبه سيزيندي». اوتوردوم. آغ اؤرتوگو برك بوغازيمين دؤورونه باغلادي. مندن سوروشدو «هاردان ووروم؟» اليمله بوينومون آلتيني گؤرستديم. تيغ چكدي. قان بوغازيمدان سوزولدو آغ اؤرتوگون اوستونه. بير كيشي ايچه‌ري‌يه گيردي. آينادان باخديم. بير درگي گؤتوروب اوخوماغا باشلادي. قان سوزولوردو. من، آينادان اؤز عكسيم اوستونده اولان درگي‌يه باخيرديم.

قيشين اورتا چاغ‌لاري ايدي. اوزون گئجه‌نين بويو لاپار-لاپار ياغان قار، آغ اؤرتويونو دام-دووارا، كؤي-كوچه‌يه سرميشدي! كوچه‌لره قالانان قارين شاختاسي، قاري ننه‌لري كورسوده، كؤرپه ببه‌لري ايسه بئشيك‌ده دوندوروردو! زينت خالا ناهاري آسيب- آسماميش قيزيلجا نوخوشلوغونا اوغرايان 3ياشيندا قيزيني، 7ياشيندا اوغلونا، هر ايكي‌سيني ايسه آللاها تاپشيرير! حيط قاپي‌سيني باغلامادان بيرداها اوجا سسله تاپشيريغيني تكرار ائدير! اوغلودا، -نيگاران اولما آناجان اؤزوم سولمازدان يَليك اولارام!- دئيه جاواب وئرير! گئجه‌ني صوبحه دك خسته بالاسي‌نين باشيندا كئشيك چكن زينتين اوردلاري باتيب، گؤزلري چوخورا دوشموشدو! آخي اونون دار دونيادا، مؤعتاد اريندن ياديگار قالان ،پيشيم-پيشيم ايله بؤيوتموش بالاجا بالالاريندان باشقا بير كيمسه‌سي يوخ ايدي!

اونون يئكه كوره‌گي سينميشدي. دئدي: گئت اونا بير سس آت، گلسين. بير- ايكي ايل‌دن سورا قالخيب، چيخديم حيطه. كنديميزين يئيين اسن يئل‌لري، ياغان قار دنه‌لري‌ني سوووروردو دام‌لارين باشينا. كؤهنه دامين، دوواري ديبين‌ده سسيمي اوجالتديم: «عمي جان؛ حاجي بابانين كوره‌گي سيندي. گل گؤر نه دئيير. سني ايستير...» اونو گؤزله‌ديم. بؤركو باشيندا، قارا يون كوت- شالواري اوستونه قونان قار دنه‌لري ايله دامين قيراغين‌دان بويلاندي منه. بوينونا ساريديغي شال‌ين آرخاسين‌دان نه گؤي گؤزلري، نه ده بورما بيغ‌لاري‌ني گؤره بيلديم. «گئت ائوه، گليرم ايندي.» دئييب؛ گؤزدن ايتدي.

من كي دوغوردان دوغرويا سني بير آدام كيمي گؤردوگومه گؤره هئچ بيلميرم قاه- قاهام اوجالسين يا‌دا قييهام.

- سن كي قاه- قاها ائتمه‌گه هر زامان تله‌سيرسن بونو من يوخ، بير كوچه اهلي‌ده بيلير، دوشونور، گؤرور...

- بسدي، بسدي. داي من سني... يوخ داي من گؤردوك‌لريمدن سؤز آچماياجاغام.

- ياني؟!

گوشي‌لرده راحاتجاسينا عكسي ياييلميشدي. اوشاغين بودار- بودار اولماسين گؤردومده توم بئله‌جه باشيما گلن بلا فيلم كيمي گؤزومون اؤنوندن گليب، كئچدي. كيمسه باخجاق اوز-گؤزون قيريشديريب، قوردو ييرتيجي حئيوان آدلانديريردي. من ائله سؤز‌لردن خوشلانميرديم. چونكو قوردون كيمليگي قورد اولماق و آج اولدوقدا هر شئيي بودارلاييب، يئمك دير. جانيميزي قوردلاردان قوروماق بيزيم سوروموموزدور. اونلار اوشاغين عاييله‌سين دانلاماق يئرينه، قوردو متهم ائديرديلر. اوشاقدا قوردلا قارشيلاشما ايمكاني يوخسا ابزاري اولسايدي قورد اونو بودارلامازدي. بلكه ده قوزولاردان بيري اوشاغا قوربان اولاردي.

هامي‌سي آتيليب دره‌ني كئچميشديلر. تكجه من قالميشديم بو تايدا. آت‌لاري سئچنده هامي‌سي منه دؤنوب «سن ‌ده بير اصيل آت سئچ. بو اوزون سفرده، بير قاطير سنه يولداش اولماز!» دئديلر. آمما نئيله‌ييم حئيوانين گؤز‌لري تكجه مني آلميشدي. ايري و مهربان گؤز‌لري ايله، ائله‌بيل منه دئييردي: «مني سئچ، مني آپار، مني بو قارانليق تؤيله‌دن قورتار»

گون آچيلدي. گونش قارانليغي شهرين اوزه‌رينه گون ساچدي، آنجاق هر گون كيمي شهر ايشيقلانمادي. بو شهرين گئجه-گوندوزو فرقلي دئييلدي. گئجه‌لر ده، گوندو‌ز‌لر‌ ده قارانليقدايدي. آنجاق شهرين خالقي‌دا قارانليغا اينانيب، ايشيغا اينانج‎لاري يوخويدو. اصلن ايشيق كؤكدن بو شهرده اونودولموشدو. شهر خالقي بو دوروما عادت ائديب، اؤز ايشيق‌سيز ياشام‌لارينا داوام ائديرديلر. هئچ كيم‌ ده ايشيق‌سيزليغين عيللتيني آختارماغا ماراق يوخويدو. هئچ گونشده ‌ده ماراق يوخويدو! تام گوجويله چاليشيب شهري ايشيقلانديرسين. گون‌لرين بيرينده بير اوزاقدان گلن كؤچري قوشون سؤزو بتر گونشه توخوندو. قوش، گونشي سئوگي‌سيزليگه متهم ائده‌رك شهرين قارانليقدا قالماغيني اوندان بيليردي.

اوشاقليقدان بري اَن‌‌‌سيز دووارلاري سوواق محله‌ميزين بؤيوك آغ ساققال و ان اؤنملي اولان «مير‌‌‌‌ بابا»ني اونودا بيلميرم. هر گون صبح يوخودان دوروب- دورماز قاپي‌نين آغزيندا اوتوراردي. بيز اوشاق‌لار هاميميز بير باهانا ايله ايسترديك سلام وئريب، اونون شيرين-شيرين اوخشامالاريندان فايدالاناق. هر بيريميزين سؤز- صحبتي اولسايدي اونونلا آرايا قويارديق او‌‌ دا‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ اؤز اوشاقليق خاطيره‎‌لريندن اؤرنك وورماقلا دئمك اولار بير جور- بير تهر بيزي دوزگون يولا يؤنلنديرردي.