|
غربت
علي ولي
بيز اوچ كيشي‌ايديك. كسمه يولوموزو آغاجليقدان سالديق. يولدا بير يولچويا توش گلديك. چيخاريب جيبيندن بير پارا كاغيذ وئردي بيريميزه. « بوردان اوزاقلاشاندان سونرا اوخويون. اوخوياندان سونرا ييرتين، تؤكون قارا آغاجين ديبينه.» دئيه؛ آغ ساققالينا هؤروب بيزه گولومسركن سؤز وئريب، سس- سميرسيز اندي چايلاغا طرف.
آغاجليغي احاطه ائدن قارانليقدا گوجه‌نيب تپه‌ني آشديق ايشيق باييرا. بيريميز يئييندن يئريييب قاباقدا دوروب «هيس!» زينه‌دن سس سالدي. سورا الي ايله بيزه ايشاره ائتدي. ايكيميزده قارا آغاجين آرخاسيندان چيخيب آييق ساييق باييرا چيخاراق نئچه آتلي‌ني او بيري ياندان آغاجليغا سوخولدوغوندا گؤرنجه گيزلنديك. اوجا آغاج‌لارين لاخ- بوداغي آراسيندان يول تاپيب، اوت- علف اوزره ايشيق ساچان گونشين ايشيلتي‌لاريندا اونلاري گؤزدن ايتيرديك. او قاباقدان گئدن بيريميزين ايشاره‌سينه يئنه سيغينديغيميز آغاج‌لارين آرخاسيندان چيخيب آييق ساييق تپه‌ني آشاراق باييرا قاچديق.
بيري- بيريميزه آرخايين بيرآز اوزاقدان گؤرونن كنده طرف يوللانديق. بير بؤيوك قايانين كؤلگه‌سينده دوروب«آچ او كاغيذي گؤرك او قوجا كيشي نه وئريب بيزه؟» دئيه كاغيذ الينده اولان يولداشيميزدان سوروشدوق. « ها تئز گلين دورما زاماني دئييل» دئيه؛ بير داها يئييندن يئريييب بيزي آرخاسيجا يئريمك زوروندا قويدو.
ايكيميز ده بيري- بيريميزه تعجب‌له باخيشيب، گئنه دينمز- دانيشماز يولا دوشدوك. كندين ياخينليغيندا آخان جوشغون چايين قيراغينا يئتيشديك. بيرآز اويانراقدا اولان اوچ قارا آغاجين كؤلگه‌سينه دالدالانديق. كاغيذ الينده اولان بيريميز يئره چؤممه‌ليب، اليني سوخدو كؤينك جيبينه. پارا كاغيذي چيخاريب گؤزو قاباغينا آلدي. مجبورن ايكيميز ده يئره چؤممه‌ليب، اونا گؤز تيكديك. اوخويوب باشيني ترپتدي. اوخوركن گؤزلري‌نين ياشي‌ني سيليب بيزه تاسف‌له باخاراق آه چكدي. بيرآزدان كئچه بؤركونو باشيندان آليب، اووجوندا بورمالاييب، بير داها يان- دؤيره‌يه، بيزه، باشي اوستونده كؤلگه سالان قارا آغاجين بوداق‌لارينا گؤز گزديريركن دريندن نفس آلدي. يئل ياواشدان اسمه‌يه باشلادي. ايكيميز يان- يانا اونا گؤز تيكه‌رك هئچ ده سسيميز چيخماييردي. بيردن بيره كئچه بؤركونو باغرينا باسيب قارنيني اووجلاماغا باشلادي. بيرآز دان سورا «من قاييديرام!» دئيه؛ آغلاماغا باشلادي. سونرا قالخيب پارا كاغيذي باشيميزا آتيب آغاجليغا طرف يوللاندي. تئز قالخيب «سنه نه اولدو پس؟! هارا قاييديرسان؟» دئيه؛ اونو قاباقلاديم. بيرآز سس‌سيز يئريييب «بيزي آلداديبلار. كند بوم- بوش دور.» دئيه؛ گؤزو ياشلي مني جاوابلاييب يئييندن يئريدي. من ده يئيينله‌ديم. بيردن بيره قايانين آرخاسيندان چيخان ايكي كيشي اونو ياخالادي. تئز دؤنوب قارا آغاج‌لارين كؤلگه‌سيندن اولان او بيريميزدن يارديم ايسته‌ديم. قالخيب كنده قاچان كاغيذ الينده اولان او بيريميزي گؤرونجه دوردوغوم يئرده دوردوم. بير داها دؤنونجه آغاجليقدان چاپان آتلي‌لاري گؤردوم.
|
