اصالت- اصالتي سئومك
علي اوجاقلو
من كي دوغوردان دوغرويا سني بير آدام كيمي گؤردوگومه گؤره هئچ بيلميرم قاه- قاهام اوجالسين يادا قييهام.
- سن كي قاه- قاها ائتمه‌گه هر زامان تله‌سيرسن بونو من يوخ، بير كوچه اهلي‌ده بيلير، دوشونور، گؤرور...
- بسدي، بسدي. داي من سني... يوخ داي من گؤردوك‌لريمدن سؤز آچماياجاغام.
- ياني؟!
- ياني كي آدام كيمي آدام اولماق سنه ياراشمير.
- من ده گئتمه‌لييم. بوندان آرتيق زيريلداما.
ايكي آدام آي ايشيغيندا بيري- بيريندن آيريليب دووار ديبي ايله يولا دوشدولر.
- خوب! اوشاق‌لار بو اوخونان اينشادان، نه نتيجه‌سي آلديلار؟!
- آغا ايجازه؟
- بلي بويورون.
- آغا! بهرامي‌نين يازقي‌سي هئچ اينشايا بنزه‌ميردي.
- نييه؟
- آخي هئچ بيلمه‌ديك نئجه بير آدامين قاه-قاها يا قييهاسي بيردن اونا ال‌وئرير؟!
اوشاق‌لار گولوشدولر. آنجاق اونون يولداش‌لاري‌نين باش‌لاري آشاغيدايدي. زنگ وورولوب قاييتديم دفتره. سونرا او بيري كيلاسا گئتديم.
آدام. من آدامام. تورپاقدان يارانميشام. يادا بير گؤزل اولان آدام دوداغيني داياييب مندن دويونجا...
اوشاق‌لار گيزلين- گيزلين گولوشورلر. بئلم گؤزل كلمه‌سي، دوداق، يا دا... اينشانين فضاسي اونلاري گولدورور. بلكه ده او محصلين مسخره لحني. كاش من آدام اولماق موضوسونو سئچمه‌يَيديم. دوغوردان اوخويان‌لار نه بيلر آدام و آدامليق نه‌دير؟! اوشاق‌لاردان قاباق مدرسه‌دن چيخيرام.
اؤز باشيما ائوه قاييديب باشلي- باشيما يازماغا باشلاييرام.
آدام اولماق ياني آدام كيمي...
يازا بيلمه‌ديگيمه يوخومو سبب گؤرورم... اصلن من بو موضونو و اينشاني يازماقدان واز گئچيب يئنه مدرسه‌يه گئتمه‌يه حاضيرلانيرام. قارا كوت-شالواريمي، قارا كؤينه‌گيمي، قارا آياق‌قابيمي گئييب مدرسه‌يه يوللانيرام.
تير 1391 - ائل گونو
